أدعية

حَسْبِيَ اللّهُ لا إِلَهَ إِلاَّ هُوَ عَلَيْهِ تَوَكَّلْتُ وَهُوَ رَبُّ الْعَرْشِ الْعَظيمِ

εïз

اللهم من اعتز بك فلن يذل، ومن اهتدى بك فلن يضل، ومن استكثر بك فلن يقل، ومن استقوى بك فلن يضعف، ومن استغنى بك فلن يفتقر، ومن استنصر بك فلن يخذل، ومن استعان بك فلن يغلب، ومن توكل عليك فلن يخيب، ومن جعلك ملاذه فلن يضيع، ومن اعتصم بك فقد هدى إلى صراط مستقيم، اللهم فكن لنا وليا ونصيرا، وكن لنا معينا ومجيرا، إنك كنت بنا بصيرا

εïз

كويس / كويسة

السلام عليكم




الكويس و الكويسة



ديما نسمعوا في هالكلمة ، ولد كويس و بنت كويسة ، لكن شن إلي يخلينا نقولوا علي فلان كويس و فلانة كويسة؟



هل فيه معايير خاصة ؟

شن هيا هالمعايير ؟



معايير دينية ، أو اجتماعية ، أو ليها علاقة بالجمال ، أو العلاقات العامة و تعامل الكويس مع الآخرين ، أو شنو بالزبط ؟؟



الموضوع طويل و لكل منا معاييره الخاصة مش يوصف أي حد بالكواسة ( كويس أو كويسة )



المدة الماضية كان هناك حوار نسائي دائر بين النساوين ( قداش ما نكره حوار يوم الثلاثاء نقعد بالسيف نسمع في حاجات عمري ما سمعتها و لا ريتها و لا تربينا على الكلام فيها ، حاجة ترفع الضغط )



المهم

وحدة منهم تحكي علي فلانة و قالت



( و الله البنت كويسة ، لكن عندها مشكلة ، ولد خالتها غر بيها و حملت منه )



عفوا !!!!

شنو !!!

كويسة ؟؟؟؟؟؟؟؟؟



كيف كويسة ؟؟؟



أي معيار خلاها كويسة ؟؟



كملت البنت كلامها و قالت

( البنت أمها و خالتها ما يعرفوش بإلي صايرلها ، ف جتني و ساعدتها و مشيت معاها لدكتور نساء و ولادة و قال البنت قاعدة عذراء طبيا ، لكنها حامل )



لا حول و لا قوة إلا بالله ، أني معاش عرفت كيف تقييمهم لكلمة كويسة .



الكويسة ، مشت دارت الغلط مع ولد خالتها ، مش ذنبها ماهي تحبه ، و تموت فيه ، و وعدها بالزواج ، و ما ترفضلاش كلمة ، و لبت طلبه بطريقة خلتها تحافظ على عذريتها لكن تمت عملية الحمل ، و طلعت مشت مع وحدة ما تقربلهاش لدكتور متخصص ، مش تبي حل لمشكلتها ، و تقول البنت كويسة ، و قاعدة شريفة لأنها قاعدة عذراء طبيا و ..............و ........... و ..........









أني معاش عرفت شن نقول و لا شن نحكي ، حاولت نلقى حاجة وحدة تخلي البنت كويسة

قالت البنت كويسة و شريفة

وين الشرف في إلي داراته ؟؟



لا حول و لا قوة إلا بالله



إستنوا شويا ، الموضوع ما كملش ، خلي نحكوا علي الكويس



يقولوا عليه كويس ، لكن الله غالب ، مبلي بالشرب ، لكن الولد يشرب بروحه في حوشهم و ما يطلع و يضر حد ، يشرب في الليل و يفيق في النهار صاحي ، و يمشي لشغله ، الحمد لله .



الولد يخدم ، و مكون نفسه و عنده حوشه بروحه كامل مأتت ، و مش ناقصة شي .



عفوا !!!!!



شنو ؟؟؟؟



كيف ؟؟؟؟



الولد كويس ؟؟؟ كيف كويس؟؟

أي معيار خلاه كويس؟؟



.............



الكويس و الكويسة بدت كلمة أي حد يقولها علي أي حد ، من غير معيار .



أو ربما فيه معايير تختلف من شخص لآخر لكي يصف أحد ما بالكواسة



الموضوع للنقاش و معرفة معاييركم عن الكواسة



و متى تقول عن فلان كويس و فلانة كويسة ؟؟؟



و متى يسقط عنهم وسام الكواسة ؟؟؟





أعتذر عن ما كتبت هنا لأنه يخالف معاييري و قد يسبب ضيقا لأحد


فما سمعته في حديث الثلاثاء يسبب ضيقا يجعلني أكره التواجد يوم الثلاثاء في ذاك المكان حتى لا أسمع ذات الحوارات .



في أمان الله





سلامي



هناك تعليقان (2):

  1. السلام عليكم

    لا يوجد معايير، فقد اصبح الكل يطلق الاوصاف على هواه فمثلا الطيب أصبح يطلق عليه درويش وهبل ، ولم يعد لمعيار الدين أي اهمية بل على العكس فالكثير يطلقون على الاشخاص الملتزمة دينيا الفاظ يندى لها الجبين

    دمتي بسلام

    ردحذف
  2. السلام عليكم

    آهٍ يا فرلشة

    وضعت يدكي على جرح كبير

    لم يعد الابيض ابيضا ولا الاسود اسودا

    بل صاروا خليطا رماديا

    بحكم البشر الذي وضع معايير جاهلة وتناسوا وضوح شمس
    الحق في دينهم....
    هداهم الله

    وسعيدة بزيارتي هنا
    إحساس فراشة

    ردحذف

نرحب بنقرات اناملك على لوحة المفاتيح هنا :) اهلا بك ......