كلمات من قاموس فراشة

السلام عليكم

قبل فترة لقيت موضوع ترفيهي عنوانه تسع كلمات تستعملها النساء

حبيت الموضوع و كتبته تاني بطريقة شخصية و درت عنوانه

كلمات من قاموس فراشة

إن شاء الله يعجبكم ، لأنه قاموس جديد من نوعه و مهم لمعرفه التعامل مع مصطلحات فراشة .

نجو للكلمة الأولى

طيب

طيب تعني عندي حاجتين ، ضد بعض ، و الشاطر يفهم الفرق بينهم .

الأولى

معاك في الكلام و كمل كلامك ، و مرات نسمعك و مرات نسايرك فقط مش تكمل كلامك .

التانية

تكون في نهاية كلامك ، أو لما ما تسكتش و نبي نسكتك ، و تعني فرصتي للكلام ، وقتها الله يكون في عونك .

الكلمة التانية

شويا بس

بالذات لما حد ينادي عليا و نكون مشغولة ، نقول شويا بس ، مرات الشويا تولي شويات و شويات تانية و هلبا شويات و ننسى الموضوع و ما يصيرش منه .

الكلمة الثالثة

مافيش شي

و هذي تعني هلبا حاجات ، يعني فيه شي ، غر إنت شد في الموضوع و أسئل تاني ح تعرف شن فيه ، و في الغالب نكون زعلانة منك ، و لو سألتني عن حالي و شن مضايقني و قلتلك مافيش شي ، يبقا فيه شي و شي خطير ، يا تسكت و معاش تسئلني ، يا تشد في الموضوع و تسئل تاني و ثالث ، وقتها إتحمل ، و الله يكون في عونك .

الكلمة الرابعة

عادي جداً ، مافيش مشكلة

و هي معناها ، مش عادي أبدا ، فيه مشكلة كبيرة ، بس مش توا وقتها ، خليها لوقت مناسب ، و لما يجي الوقت المناسب ، الله يعينك ، لأنه ح يجي بعد تخطيط و تدبير و حساب للنتائج و الخسائر ، و توا ما نبيش نشغلك بالك .

الكلمة الخامسة

أوكي

و تكون سريعة جدا و بصوت واطي غير مبالي

و في الغالب بعد ما تطب مني حاجة و تكون مش عاجبتني .

معناها أنسى الموضوع ، أو غيره ، أو زي ما يقول بابا ( لا ما نقول لا و الحاجة ما تنقضا )

الكلمة السادسة

ريح روحك ، ما نبيكش تتعب .

طبعا الكلمة هذي خطيرة جدا ، للوهلة الأولى تعتقد أنها آمنة جدا ، و حنينة ، و تبي راحتك .

لكن ركز ع النبرة ، نبرة الصوت ، إذا كانت مش مطمنة و مش مطمن لطريقة نطق الكلمات ، يبقى ، جهز نفسك لحاجة غير متوقعة .

و تكون في الغالب هالكلمة بعد ما نطلب حاجة و يتمش تنفيها رغم إلي طلبتها منه يقدر يتفذها .

ممكن بعدها تطلب مني حاجة جدا ساهلة و بسيطة و ما إنفدهاش .

الكلمة السابعة

صحيت

و هي تعني أني سمعت حاجة ما عجبتنيش عليا ، و ما نبيش نرد كلمة بكلمة معاك ، ف نقولك

صحيت ، أني هكي؟؟؟؟

بارك الله فيك ، آخر عمري تقول عليا هكي ، و أني إلي قلت إنك آخر إنسان ممكن تقول هكي و ..............

و يبدأ موشح كل مرة ، و الله يكون في عون إلي غلط في كلمة .

الكلمة الثامنة

هذي مش كلمة

هي صوت

الكتابة نفس الحروف

بس النطق يختلف

نحاول نكتبها هنايا

أها

أهاا لو كانت سريعة يعني معاك نستنى في باقي كلامك ، كمل كلامك و أني قاعدة نفكر في شن تقول ، و عندي رد بس بعد ما تكمل كلامك .

و تكون هلبا في أثناء الحوار . بالعشرات.

أه

 و تكون خفيفة جدا الكلمة و نقولها و فمي مصكر، و كأني نقول ، بسرعة كمل كلامك ، عندي حاجة تانية بنديرها . و ما عندي ما نزيد علي كلامك .

أهااااااااااااااااا

هذي تكون بلهجة من وجد الكنز ، يعني وصلت لنقطة ندور فيها ، و لقيتها ، و تكون أيضا في وسط الحوار ، و وقتها من اللهجة بروحك ح توقف كلامك لا إراديا و تعطيني الفرصة لإستلام الحوار.

في الغالب تكون هكي

أهاااااااااااااااااا طيب

يبقى إستعمل القاموس لفهم معانيها .

بس فيه سر

لو كنت نقول الكلمات و كانت ابتسامتي عريضة و عادية جدا ، يبقى أعني الكلمات فعلا و أعني جانبها المشرق ، و لو كانت الكلمات بنبرة غير سليمة ، و وجهي ملامحه غير معروفه ، يبقى أرجع بسرعة للموضوع ، و أقرى الترجمة ، و الله يكون في عونك .

أكيدة الكل عندهم كلمات خطيرة و بروحهم يستعملوا فيها ، حبيت تشاركونا بيها

سلامي