اللهم أرزقني نفسا مطمئنة ترضى بقضائك

الجتامة

السلام عليكم



ظلام ، لا تستطيع أن تتحرك، و كأنك مقيد لكن لا وجود للقيود ، تعي ما يدور حولك و تسمع الأصوات ، لكن لا تستطيع التكلم و إصدار الأصوات لطلب مساعدة أحد فيما أنت فيه ، ضيق في التنفس ، إجهاد للقلب الذي بدأ يضخ الدم بقوة لم تعتد عليها ، و أعراض أخرى تصاحب ما أصابك .



قد تصيبك هذه الأعراض أثناء نومك ، فتخاف منها جدا و تفكر في عقلك أن ملك الموت قد زارك يبغي روحك .



لكن ليس هذا ما يجري أبدا .



فملك الموت لن يزورك حتى تأتي ساعتك ، و إن زارك لن يغادر حتى يأخذ ما أمر بأخذه ، و إن أخد الأمانة لن تستطيع أن تحكي لأحد ما أصابك .



هذه الأعراض هي ما نسميه في اللغة العامية ( الجتامة ) ، فقد نسمع عن فلان جاته جتامة أو فلانة جتها جتامة .



التعريف العلمي لهذه الحالة .

تأتي هذه الحالة أثناء النوم ، فقد تنام بطريقة تمنع فيها حركة الدم في الجسم بطريقة سليمة ، فيقل تدفق الدم في الجسم ، و بالتالي يقل وصوله إلى المخ ، فيبدأ المخ بالهلوسة نتيجة نقص معدل الأكسجين الواصل إليه ( مؤشر خطر يا سبحان الله ) .



إذا زادت الفترة الزمنية لهذه الحالة و بقيت على ذات الوضع قد تسبب هذه ( الجتامة ) مخاطر صحية على الدماغ ، و في حالات نادرة تؤدي للوفاة .





لا تخافوا أبدا ، فالحل لهذه الجتامة بسيط جدا



في البداية لا تخافوا أبدا منها ، و ما عليكم حين الشعور بها إلا أن تتنفسوا جيدا ( و أتركوا الهلع جانبا لأن لن يزيد الحالة إلا سوءا ).

بعدها تحاولون مد الذراعين و عدم ترك المرافق مثنية ( ستلاحظون أنها باردة و بها خدر بسيط و تنمل ) .

بعدها أزيحوا أي شيء موجود على صدركم لأنه يضايق القلب في عملية ضخ الدم ( بطانية ، وسادة ، أيديكم ، أي شيء موجود على الصدر ).



بعدها ستستطيعون الحركة إن شاء الله ، قوموا بتغيير وضعية نومكم ، و الأفضل أن تكونوا ناميين على جنوبكم فهذا أفضل .

أغلب الحالات يكون سببها النوم على الظهر مع وضع اليدين على الصدر و ثني المرفقين .

و حالات أخرى تكون بالعكس ، حيث النوم على البطن مع ثني اليدين أيضا و وضعهما تحتك .



أتمنى أن أكون قد وضحت الفكرة ، و قللت الخوف عن الذين يعانون من الجتامة في نومهم



همسة

فراشة أيضا كانت تخاف من الجتامة في أول مرة شعرت بها ، لكن الحمد لله الإنترنت وفر كل المعلومات المطلوبة حتى تفهم و تعي ما يجري لها .



حماكم الله من مخاطر الجتامة ، و رزقكم نوما هادئا هانئا لا يعكره كابوس مزعج و لا جتامة مخيفة .





سلامي

كويس / كويسة

السلام عليكم




الكويس و الكويسة



ديما نسمعوا في هالكلمة ، ولد كويس و بنت كويسة ، لكن شن إلي يخلينا نقولوا علي فلان كويس و فلانة كويسة؟



هل فيه معايير خاصة ؟

شن هيا هالمعايير ؟



معايير دينية ، أو اجتماعية ، أو ليها علاقة بالجمال ، أو العلاقات العامة و تعامل الكويس مع الآخرين ، أو شنو بالزبط ؟؟



الموضوع طويل و لكل منا معاييره الخاصة مش يوصف أي حد بالكواسة ( كويس أو كويسة )



المدة الماضية كان هناك حوار نسائي دائر بين النساوين ( قداش ما نكره حوار يوم الثلاثاء نقعد بالسيف نسمع في حاجات عمري ما سمعتها و لا ريتها و لا تربينا على الكلام فيها ، حاجة ترفع الضغط )



المهم

وحدة منهم تحكي علي فلانة و قالت



( و الله البنت كويسة ، لكن عندها مشكلة ، ولد خالتها غر بيها و حملت منه )



عفوا !!!!

شنو !!!

كويسة ؟؟؟؟؟؟؟؟؟



كيف كويسة ؟؟؟



أي معيار خلاها كويسة ؟؟



كملت البنت كلامها و قالت

( البنت أمها و خالتها ما يعرفوش بإلي صايرلها ، ف جتني و ساعدتها و مشيت معاها لدكتور نساء و ولادة و قال البنت قاعدة عذراء طبيا ، لكنها حامل )



لا حول و لا قوة إلا بالله ، أني معاش عرفت كيف تقييمهم لكلمة كويسة .



الكويسة ، مشت دارت الغلط مع ولد خالتها ، مش ذنبها ماهي تحبه ، و تموت فيه ، و وعدها بالزواج ، و ما ترفضلاش كلمة ، و لبت طلبه بطريقة خلتها تحافظ على عذريتها لكن تمت عملية الحمل ، و طلعت مشت مع وحدة ما تقربلهاش لدكتور متخصص ، مش تبي حل لمشكلتها ، و تقول البنت كويسة ، و قاعدة شريفة لأنها قاعدة عذراء طبيا و ..............و ........... و ..........









أني معاش عرفت شن نقول و لا شن نحكي ، حاولت نلقى حاجة وحدة تخلي البنت كويسة

قالت البنت كويسة و شريفة

وين الشرف في إلي داراته ؟؟



لا حول و لا قوة إلا بالله



إستنوا شويا ، الموضوع ما كملش ، خلي نحكوا علي الكويس



يقولوا عليه كويس ، لكن الله غالب ، مبلي بالشرب ، لكن الولد يشرب بروحه في حوشهم و ما يطلع و يضر حد ، يشرب في الليل و يفيق في النهار صاحي ، و يمشي لشغله ، الحمد لله .



الولد يخدم ، و مكون نفسه و عنده حوشه بروحه كامل مأتت ، و مش ناقصة شي .



عفوا !!!!!



شنو ؟؟؟؟



كيف ؟؟؟؟



الولد كويس ؟؟؟ كيف كويس؟؟

أي معيار خلاه كويس؟؟



.............



الكويس و الكويسة بدت كلمة أي حد يقولها علي أي حد ، من غير معيار .



أو ربما فيه معايير تختلف من شخص لآخر لكي يصف أحد ما بالكواسة



الموضوع للنقاش و معرفة معاييركم عن الكواسة



و متى تقول عن فلان كويس و فلانة كويسة ؟؟؟



و متى يسقط عنهم وسام الكواسة ؟؟؟





أعتذر عن ما كتبت هنا لأنه يخالف معاييري و قد يسبب ضيقا لأحد


فما سمعته في حديث الثلاثاء يسبب ضيقا يجعلني أكره التواجد يوم الثلاثاء في ذاك المكان حتى لا أسمع ذات الحوارات .



في أمان الله





سلامي

حلوى القرعة

السلام عليكم

حلوى القرعة

أو مربى القرعة الحمرا

من إختراعات فراشة

المقادير مش محكومة ، و مش شرط تكون نفسها

كله على حسب الرغبة

كل المقادير الضرورية

قرعة حمرا ( بكيوه)

و سكر

عود قرفة

و ليمونة

تقريبا المقادير نفسها إلي في الصورة

نقطع القرعة لمكعبات زي ما في الصورة

و نحطها في طنجرة تكون سناتلس ستيل

و قعرها سميك

و نرش عليها السكر و نحط عود القرفة و نعصر الليمونة و ما نصفيش قلوبها ، لأن ليهم فايدة في كرملة السائل و الحفاظ على لزوجته .

نحط الطنجرة على نار هادية ، و نغطيها

و ما نضيفش أبدا أي سوائل

مع الوقت ح تلقى إن القرعة نزلت إميتها

و نخلوها إتطيب في إميتها

صورتها بعد نصف ساعة ع النار

شايفين الميا و اللون كيف تغيير؟؟

الطبخة تحتاج من ساعة إلى ساعة و نص و هيا على نار هادية

النتيجة

صحتين

شخصيا نحب ناكلها زي المرى مع الخبزة

أو بالكاشيك زي الحلوى

و ممكن نحطها على البان كيك بدل العسل أو عصير القيقب

إن شاء الله تكون عجبتكم

سلامي

بعض الصناديق

السلام عليكم

صناديق

كم أحب الصناديق

أحب جمعها

متلك منها بمختلف الأشكال و الألوان

و بمختلف الأحجام

شكرا SPECIAL

شكرا SPECIAL

كلمات من قاموس فراشة

السلام عليكم

قبل فترة لقيت موضوع ترفيهي عنوانه تسع كلمات تستعملها النساء

حبيت الموضوع و كتبته تاني بطريقة شخصية و درت عنوانه

كلمات من قاموس فراشة

إن شاء الله يعجبكم ، لأنه قاموس جديد من نوعه و مهم لمعرفه التعامل مع مصطلحات فراشة .

نجو للكلمة الأولى

طيب

طيب تعني عندي حاجتين ، ضد بعض ، و الشاطر يفهم الفرق بينهم .

الأولى

معاك في الكلام و كمل كلامك ، و مرات نسمعك و مرات نسايرك فقط مش تكمل كلامك .

التانية

تكون في نهاية كلامك ، أو لما ما تسكتش و نبي نسكتك ، و تعني فرصتي للكلام ، وقتها الله يكون في عونك .

الكلمة التانية

شويا بس

بالذات لما حد ينادي عليا و نكون مشغولة ، نقول شويا بس ، مرات الشويا تولي شويات و شويات تانية و هلبا شويات و ننسى الموضوع و ما يصيرش منه .

الكلمة الثالثة

مافيش شي

و هذي تعني هلبا حاجات ، يعني فيه شي ، غر إنت شد في الموضوع و أسئل تاني ح تعرف شن فيه ، و في الغالب نكون زعلانة منك ، و لو سألتني عن حالي و شن مضايقني و قلتلك مافيش شي ، يبقا فيه شي و شي خطير ، يا تسكت و معاش تسئلني ، يا تشد في الموضوع و تسئل تاني و ثالث ، وقتها إتحمل ، و الله يكون في عونك .

الكلمة الرابعة

عادي جداً ، مافيش مشكلة

و هي معناها ، مش عادي أبدا ، فيه مشكلة كبيرة ، بس مش توا وقتها ، خليها لوقت مناسب ، و لما يجي الوقت المناسب ، الله يعينك ، لأنه ح يجي بعد تخطيط و تدبير و حساب للنتائج و الخسائر ، و توا ما نبيش نشغلك بالك .

الكلمة الخامسة

أوكي

و تكون سريعة جدا و بصوت واطي غير مبالي

و في الغالب بعد ما تطب مني حاجة و تكون مش عاجبتني .

معناها أنسى الموضوع ، أو غيره ، أو زي ما يقول بابا ( لا ما نقول لا و الحاجة ما تنقضا )

الكلمة السادسة

ريح روحك ، ما نبيكش تتعب .

طبعا الكلمة هذي خطيرة جدا ، للوهلة الأولى تعتقد أنها آمنة جدا ، و حنينة ، و تبي راحتك .

لكن ركز ع النبرة ، نبرة الصوت ، إذا كانت مش مطمنة و مش مطمن لطريقة نطق الكلمات ، يبقى ، جهز نفسك لحاجة غير متوقعة .

و تكون في الغالب هالكلمة بعد ما نطلب حاجة و يتمش تنفيها رغم إلي طلبتها منه يقدر يتفذها .

ممكن بعدها تطلب مني حاجة جدا ساهلة و بسيطة و ما إنفدهاش .

الكلمة السابعة

صحيت

و هي تعني أني سمعت حاجة ما عجبتنيش عليا ، و ما نبيش نرد كلمة بكلمة معاك ، ف نقولك

صحيت ، أني هكي؟؟؟؟

بارك الله فيك ، آخر عمري تقول عليا هكي ، و أني إلي قلت إنك آخر إنسان ممكن تقول هكي و ..............

و يبدأ موشح كل مرة ، و الله يكون في عون إلي غلط في كلمة .

الكلمة الثامنة

هذي مش كلمة

هي صوت

الكتابة نفس الحروف

بس النطق يختلف

نحاول نكتبها هنايا

أها

أهاا لو كانت سريعة يعني معاك نستنى في باقي كلامك ، كمل كلامك و أني قاعدة نفكر في شن تقول ، و عندي رد بس بعد ما تكمل كلامك .

و تكون هلبا في أثناء الحوار . بالعشرات.

أه

 و تكون خفيفة جدا الكلمة و نقولها و فمي مصكر، و كأني نقول ، بسرعة كمل كلامك ، عندي حاجة تانية بنديرها . و ما عندي ما نزيد علي كلامك .

أهااااااااااااااااا

هذي تكون بلهجة من وجد الكنز ، يعني وصلت لنقطة ندور فيها ، و لقيتها ، و تكون أيضا في وسط الحوار ، و وقتها من اللهجة بروحك ح توقف كلامك لا إراديا و تعطيني الفرصة لإستلام الحوار.

في الغالب تكون هكي

أهاااااااااااااااااا طيب

يبقى إستعمل القاموس لفهم معانيها .

بس فيه سر

لو كنت نقول الكلمات و كانت ابتسامتي عريضة و عادية جدا ، يبقى أعني الكلمات فعلا و أعني جانبها المشرق ، و لو كانت الكلمات بنبرة غير سليمة ، و وجهي ملامحه غير معروفه ، يبقى أرجع بسرعة للموضوع ، و أقرى الترجمة ، و الله يكون في عونك .

أكيدة الكل عندهم كلمات خطيرة و بروحهم يستعملوا فيها ، حبيت تشاركونا بيها

سلامي

كريكاتير كل الدكاترة 1

اليوم بالصدفة وجدت مجموعة صور كريكاتير عدلت فيها قليلا لتناسب وضعها في منتدى كل الدكاترة



أحبت أن أضعها هنا مرة أخرى

سلامي