فشة خلق

السلام عليكم

هذا الموضوع يعتبر فشة خلق
نبي نشكي و نحكي و نفش خلقي
ممكن تكتبو تعليق
او تمرو زي العادة من غير ما تكتبو تعليق

من فترة و اني مهمومة ، مزاجي عكر ، و ما عنديش نية اندير شي ، مستاحشة هلبا حاجات ، أولها النوم ، و ثانيها التلفزيون ، و ثالتها قراية كتاب جديد ، راضية حتى برواية ، او مجلة ، مستاحشة نخش المطبخ و ندير كيكه ، بشكطي ، حاجة حلوة ، مستاحشة نقعد في الجنان و نتشمس شويا ، مستاحشة نسمع اغنية انت عمري لأم كلثوم أو أغنية محمد حسن يسلم عليك العقل على رواااااااااق ، مستاحشة نفسي زمان إلي كل مرة تدير حاجة جديدة و تتعلم حاجة جديدية ، حاطة في بالي من زمان اتعلم حياكة الصوف ، و نتعلم العزف على القيثار ، لكن مرت سنة ما تعلمتهمش ، قاعدة محلك سر ، و ما تعلمت منهم شي .

مش عارفة خيرني ، او خيرها الدنيا معاي ، اني تغيرت أو الدنيا تغيرت ؟، مش عارفة .

مستاحشة نبكي نبكي نبكي لين نرتاح و لا احد يقولي علاش ، و مستاحشة نضحك نضحك نضحك و من وسط خاطري و تضحكو معاي ، مستاحشة انادي بأعلى صوتي ، و لا واحد يقولي اسكتي ، مستاحشة نجري ولا واحد يقولي اوقفي ، مستاحشة نقول كل إلي في خاطري و لا واحد يفهمني غلط .

مستاحشة حمودة رغم انه كان معاي ، مستاحشة اللعب معاه ، مستاحشة اضمه في حضني بكل قوة ، مستاحشة قبلاته الرطبة بروايقه ، مستاحشة كلامه المتكسر ، مستاحشة ضحكته إلي ترد الروح ، مستاحشة نسمعه ينادي اسمي ، مستاحشاته رغم انه كان قدامي ، هارب مني ، ما يبيش يلعب معاي ، و كل ما حاولت اقبله يعطيني كف ، حتى الكلام معاش كلمني ، نسمع في ضحكاته لكن ضحكاته مش ليا ، حتى اسمي نساه ، و صار ينادي فيا بإسم تاني .

مستاحشة بابا ، مستاحشة نطلع معاه بروحنا ولا احد معانا ، نسئل عن اخباره ، نحكيله اخباري ، نشكي ، ممكن نبكي ، او ممكن نغني و يغني معاي ، مستاحشة نمشي على شط البحر معاه، مستاحشة ناكل بيتزا اني وياه ، مستاحشة ناكل دجيلاتي ، مستاحشة نشرب مارقريتا عصير الرمان، مستاحشة نمشي معاه ع الكورنيش ناكلو بوب كورن ، مستاحشة نمشي معاه للمدينة و نلفو في شوارعها و ازقتها الضيقة القديمة و اسواقها ماسكين في ايدين بعض ، مستاحشة نتصل بيه و ما تردش عليا ليبيانا أو المدار بأن هاتفه لا يمكن الوصول إليه ، معاش فهمت 4 نقالات كلهم فيهم مشكلة ، ولا واحد كويس ، قداش ما تعفلق فيا هالحاجة ، لما تتصل بحد و تبيه،يا تلقى رقمه ينادي و ما يرد حد ، يا ترد عليك الشبكة تقولك لا يمكن الوصول إليه ، مغلق ، خارج التغطية.


مستاحشة نكون نفسي نكون فراشة اتدير شن تبي و ما تخافش من شي ، نكون فراشة إلي يتقبلها الجميع بكل صدر رحب ، فراشة إلي مافيش حد يحرج من كلامها .

مستاحشة نكمل خدمتي على اكمل وجه ، و معاش نقول للزبون تعالى غدوى او الاسبوع الجاي.

مستاحشة نقرا قرآن من غير ما نسرح ، مستاحشة انصلي من غير ما نقول زعمة صليت 4 ركعات او 3 ركعاك؟ ، زعمة نسيت ركعة أو زدت ركعة ؟، مستاحشة نرفع ايديا و ندعي و أني متأكدة إن دعوتي مستجابة .

مستاحشة نسع الكلام و الحوار من اوله لآخرة ، و نشارك فيه ، من غير ما تتحول الكلمات لمجرد همهة ماليهاش معنى ، مستاحشة لما يسئلني حد سؤال نكون عارفة الاجابة ، ما نقول مش عارفة او نسيت ، مستاحشة لما حد يكلمني نكون منتبهه معاه و نجاوبه و نحاوره و ما نرسمش على وجهي نظرة الاهتمام و الاستماع ليه، بينما اني مش فاهمة شن يقول ولا عن شن يتكلم ، فقط نقوله (به ، كمل ، و بعدين ، بجديات!! )و غيرها من الكلمات إلي صارت زي الايقاع ، تتكرر بحسب نبره صوته أو بحسب الكلمة الأخيرة إلي سمعتها .

مستاحشة روحي ، معليش بعد ما تقرو هالموضوع اتلفتو حوليكم ، دورو معاي ، ممكن تلقو روحي قاعدة معاكم ، مقعمزة جنبكم ، او واقفة وراكم ، او تشوفوها في المراية ، قولولها تروح ، و تجيني ، راني قاعدة من غيرها مهمومة و منكدة، قولولها تروح في اول فرصة ، او تعالو جيبوها معاكم ، على الاقل تردولي روحي و تربحو فيا الاجر.

آخر كلام سلام