نحن شعب يشرب الكحول

السلام عليكم
قضية الكحول و التسمم قضية الكل عرف بيها ، و الكل كان ليه رد فعل خاص بيه اتجاهها ، مش ح نحكي علي القضية من وجهة نظر الشارع ، ولا الفيس بوك ، ح نحكي  عليها من نظرة أبعد من كونها مجموعة تعاطت الكحول في صمت لكنها لم تكن موفقة في اختيارها لموزع هذه المادة ، فكان نصيبها من الجرعات المسمومة ، و هناك من أعلن عن تسممه و هناك من قضى نحبه في صمت خشية الفضيحة .
المهم خلونا نرجعو كم عام للخلف ، فيه فترة صارت فيها ضجة علي موضوع السماح بتجارة الخمور علنا ، بكحم إن ليبيا ح تصير مركز سياحي و السياح ح ايجو و عادي جدا ينباع المشروب الكحولي جنب البيبسي ، الشعب الليبي رفض هذا الأمر و قال إنه شعب مسلم 100% و ما نبوش تخش هالمحرمات و نحن ما نتعاطوش فيها و شعب محافظ ، و غيره من كلام المثل و القيم إللي تعودنا عليها في المجتمع ، في الواقع الناس تتعاطى الخمور لكن قدام الناس نحن ناس ملائكة تمشي على الأرض ، المهم فيه جهة معينة من مصلحتها تبين للعالم ان الليبيين مش شعب كويس زي ما هما فاهمين ، من مصلحتها تشوف واقع الليبيين  بأرقام ملموسة و نسب ، و لما يطلع هالارقام و يصير في يومين بس حوالي 400 حالة سكر من مشروب مسمم ، لك ان تقدر كم شخص سكت و ما مشاش عاين ، و كم شخص شرب مشروب مش مسموم .
هنايا لما حصلوا هالارقام خلاص القناع طاح ، و العالم عرف إن الشعب الليبي فيه متعاطي الخمور بكثرة ، و معاش عنده المجتمع حجة قوية لرفض بيع هذه المشروبات .
يعني يا شباب حاليا ممكن اتقولوا أهلا بزجاجات الخمر بالقرب من زجاجات البيبسي .

شن رأيكم ؟؟؟ أو عندكم كلام تاني ؟؟؟