سأرشح نفسي ، هل ستنتخبونني؟؟؟

السلام عليكم

أيها الشعب العظيم ( معمر ما قالهاش ـ أني بنقولها )

أيها الشعب العظيم ، كيف حالكم ؟ إن شاء الله تكونوا بخير .

جاية بنقوللكم أنه أني نبي نترشح لرئاسة الدولة

و نبيكم تنتخبوني

لو سألتوا علاش تنتخبوني ح نقوللكم لسببين

الأول أنه أني من المناضلات في هذه الثورة و من حقي أني و ليس غيري نكون رئيسة ، وقت الحرب ما طلعتش برا الحوش و قعدت في البلاد ما سافرتش ، و عندي جنسية وحدة ، و اعتصمت و معاش مشيت الشغل ، و خوي أسير قعد 100 يوم محبوس ، و ولد بنت خالة بوي شهيد ( أول شهيد ـ هكي قالولي ) ، و كنت نعطي في إحداثيات و خرائط للناتو ، و عندي زوز خوت كانوا في الجبهة و نص شباب العيلة كانوا في مصراته ، ناظلت في قضية المجاهدات الحرائر و طلعت مظاهرات ، و معتصمة في الميدان ، و حصلت خلعات من الناتوا و من سلاحف النينجا ، و كنت نكره القذافي جدا جدا ، و الدليل لما نتفرج ع التلفزيون و نلقاه يخطب نغير القناة طول ، مشيت لميدان الشهداء و طيبت للثوار و درت هلبا حاجات مش ح نطول عليكم بذكرها .

و السبب الثاني نقوللكم أنه أني بس ح نخلي البلاد شي تاني ، حاجة فوق الخيال ، ح نخلي الناس إللي تخدم كلها تاخد معاشات ، و الناس كلها تدير حياش ، و الناس كلها تتعلم و تقرا كويس ، و الصحة يا سلام ، و كل جريح ح يحصل علاج ، و كل من حوشه طاح يبنيه ، و كل من سيارته فسدت يصلحها ، و أكثر من هذا ، لكن كل واحد حسب إمكانياته الخاصة و فلوسه ، طبعا لا يستوي الذين يعملون و الذين لا يعملون ، من يخدم ح يحصل و من ما يخدم الله غالب عليه ، معقوله ح نساويه بمن يخدم و مسيب حوشه و يسهر علي خدمة الشعب ؟؟؟

ح نسهر علي خدمتكم ، و مش ح نرضي يكون غيري خديم ليكم ، لهذا أول شي ح نديره نغير الدستور و نخلي مدة الرئاسة مدى الحياة ، و الله ما تهونوا عليا نخلي غيري يخدمكم ما دمت حية .

و من يسهر علي خدمتكم يرضى ياخد الأسود ، و يفككم من دوشته ، و ما يرضيني تسيبوا عيلتكم و تخمموا في النفط أني ح نريحكم منه .

و لو سألتوني شن توجهاتي السياسية بنقوللكم ، هاتوا كل التيارات و حطها في خلاط كبير و صفيها بالصفاي ح يطلعلك توجهي السياسي .

لو بتقولوا علاش مرا تحكمنا ، نقوللكم حكموكم الرجالة و ما مشاش الحال ، جربوا مرة تحكمكم مرا ، و زي ما يقول المثل ( مجرب المجرب مهبول )

توا نخليكم في أمان الله .