مكتبتي

كساد و النقال جديد مش نقالي نقال اخوي حبيت انصور احلى مكان عندي في البيت يعني المفضل و نبيكم تعطوني رأيكم

هذا الركن الخاص بالكتب الي نحبها و الي مازال ماقريتهاش

لكن الباقي موجود في صناديق في دار الخزين لان المكان لا يتسع للكل.

الكتب الجديدة كتاب التعابير الشعبية الليبية اشتريته

و كتاب سكان ليبيا تحصلت عليه (صادرته) من احد افراد العائلة.

درج الصور ، مش عارفة ليش هما شويا ممكن هذا ماتم انقاده من الحريق الكبير الذي اكل كل شيء احبه.

درج الاقراص المدمجة و عدة الكومبيوتر الخفيفة درج مليان و رزين يحتاج لفرز.




مفهوم جديد للملفات المضغوطة التقرير الكبير صار صغير و قلت لهذه الطريقة لأني لا املك مكان آخر لحفظ التقارير فكان لازم انصغر حجمها.





هذا المدفع قديم من يوم ماوعيت ع هادنيا و هو في هالمكان ماحاولناش نغيرو مكانه .

كل يوم عيد

فراشة و الكومبيوتر

من الكساد بديت نعاود في فتح اغلب الملفات في الجهاز الي عندي في الحوش و بديت ندور في الملفات القديمة من كتب اليكترونية و لقيت عندي كتب عن تجميع الجهاز و لغات البرمجة الي فهمت منها شويا و الباقي مش عارفة كذبت علي روحي و قلت فاهماته لكن ماعرفتش من وين جو هالملفات لغة سي و الهتمل و الفيجويل بيزك و كلهم بالعربي الحمد لله بس مالقيتش فيهم ملف واحد يشرح ليش الجهاز يوقف لما يرزن او لما نفتح عدد من الملفات مع بعض، اني شاكة في المروحة لكن خايفة ندير فيه زي الجهاز الي قبلة (ابو زريق) فتحته معاش تصكر و لما رفعته للمهندس انصدم و قال هذا معاش يخدم بكل (الله برحمه) الحقيقة اني ماخفتش ع البلاكي ( سميته البلاكي لأن لونه اسود ) بس خفت علي روحي شن ندير من غير كومبيوتر مش قادرة نتخيل روحي من غيره.
اول يوم فكرت بالحصول على جهاز كان في 99 مشيت يوم لمكتب بابا لقيت عنده واحد في المكتب واااااااااااااو كومبيوتر قالي استني هنايا توا نجيك ماكنتش نعرف نفتحة فقعدت نلعب بيه و هو مصكر نتفرج عليه نتحسس فيه نمرر في ايدي عليه عجبني ملمسه و كترة تفاصيله و الفضول يتغلل لقلبي شويا شويا زعمة كيف يخدم و شن يديرو بيه و بقلب البنت بعمر 17 عام حبيته و خش قلبي من اوسع ابوابه باب حب التعلم.
في المرواح من قرقارش لتاجورا الطريق طويلة قعدت نضرب خماسي في سداسي زعمة كيف نقول لبابا نبي جهاز كومبيوتر باهي شن امكانياته زعمة نقدرو نخلو واحد في الحوش مانبيش الا واحد و حتى التعلم ياودي نتعلم فيه بروحي فبعد صمت طويل طويل و بابا مش متعود علي صمتي في السيارة قالي وين وصلتي هالكلمة المعتادة نسمعها لما نكون سرحانة او نخطط لشيئ فقلتله هو الكومبيوتر شن اتدير بيه انت فضحك بصوت عالي قالي عرفتك ح تتكلمي ع الكومبيوتر ف بدي يشرحلي بالشويا بالشويا ع الكومبيوتر شن هو و شن يديرو بيه لكن اقنعني اني في الحوش مش ح نحتاجه اقفلت الموضوع لفترة من الزمن بعد ايام و اسابيع قليله مشيت لحوش وحدة من صاحباتي الي كنت نقرا معاها في الشهادة الثانوية ف كانت المفاجأة ،في ركن الغرفة جلس بكل كبرياء جهاز كومبيوتر ذهلت و اعجبت بالامر فسألتها شن اتديري بالكومبيوتر فجاوبتني مش متاعي متع بابا يخدم عليه و احني مانمسوش فيه صارلة زمان ما انفتح قلت في قلبي ياحرام هالجهاز المناسب في المكان المش مناسب ف طول الدرس و اني مسيبة الاستاد يشرح لكن عيونى تتفرج ع الكومبيوتر لك شوحلو و مهضوم علي قولت اخواننا اللبنانيين
فرجعت للبيت علي رجليا و فيه صوت في عقلي يقول لازم كومبيوتر لازم لازم اول ماوصلت لقيت ورقه مقدمة من احدى الشركات بتوريد عدد من اجهزة الكومبيوتر ف قريت الاسعار طول شفت ارخص واحد لقيت حقه مايساوي فلوس فطوري ل 3 سنين وااااااك هلبا بتفكير الفتاه الصغيرة قلت بابا لاغي الموضوع و مش ح نكلمه تاني لين نحصل سعره على الاقل النص مش يساعدني في النص التاني و بديت في تجميع فلوس فطوري دينار علي دينار و ربع علي ربع و فجأة بعد الامتحانات الاولى روحت للحوش بعد مشي مسافة 2كيلومتر الي كانت المسافة الفاصلة بين المدرسة و الحوش نلقى في صناديق و رقية مختلفة الاحجام مرمية في الجنان زعمة شن شاريين و حاولت نقرا شن مكتوب مالقيتش الا اسم بابا هيا توا نخش و نعرف و لقيت الي ماصدقتاش جهاز كومبيوتر ياربي يخليلي بابا قلت في قلبي لكن بعدين عقلي قال لالا ماتفرحيش ممكن هذا واحد من اجهزة العرض متع الشركة و بابا جابه تجربة بس فقلت السلام عليكم كيف حالكم توا و بسؤال غبي سألت الجميع هذا شنو؟؟ فضحك بابا قالي هذا كومبيوتر للحوش ليكم كلكم طرت من الفرحة و الدمعة في عيني فكابرت ع اساس مش معدله و قلتلهم مبروك عليكم و خشيت نغير في حوايجي و اكتشفت ان الشقاقة متحركة من مكانها و مذكرت يومياتي مفتوحة عرفت بابا قراها و جابلي الجهاز يااااااااااااااااسلام هذا كان اول جهاز نوعه الفاتح يادوبك كنت نعرف نطبع او نلعب كارطه وألغام و شويا نلعبو سوبرماريو و يعد شويا الجهاز فسد رفعه بابا للمهندس بس كان الباين اني لما نحوس في المايكومبيوتر كنت نلغي في ملفات ماتبيش تفتح حسيتها زايدة لكنها كانت ملفات النظام غلطة كبيرة معليش المرة هاذي تعلمت مش كل الملفات لازم تنفتح ولما روحت من المهندس حاولت نركب الجهاز لكن ارتكبت خطأ فادح ركبت الشاشة في مكان غلط ف طلعت نار تقدر تضحك لكن كانت اول مرة نركب الجهاز بروحي لكن الحمد لله بابا كان معاي و الحوش فيه نظام فصل الكهرباء الاوتوماتيكي يعني انخلعت شويا لكن بابا طمني قالي فداك الشاشة غدوى تكون عندك وحدة تانية وفعلا هكي صار ماكانش فيه سماعات ولا طابعة مع الوقت شفت في التلفزيوم برنامج عن الكومبيوتر ف أول ماشد انتباهي فيه صوت طالع من الكومبيوتر شي حلو فيه حاجة اسمها نت و من اهني بدي حب النت ياسلام الناس تكلم بعضها صوت و صورة شي حلو خزنت هالمعلومات في راصي و عرفت شن البرامج المحتاجتها استنيت لأول زيارة للمكتبة و شريت كتابات ع الموضوع و في المرواح مشيت للمهندس و منها شريت السماعات و بعدين حسب مانتفكر كان موعد تسليم مشروع اختي ف بابا جابلها طابعة مش تطبع مشروعها الطابعة كانت اسود بس لكن كنت راضية بيها بعد ايام اشتركنا بالنت و بديت نفركس في كل شي صار بابا المعلم الكبير يطلب مني المساعدة في كل شي الطباعة الحسابات اكسل و غيرها كنت من اول الطالبات الي قدمت التقرير في الصورة المطبوعة كان ابداع صحيح كنت نطبع بإيد وحده و كانت المونتر صغيرة و الطابعة ابيض و اسود لكن الحمد لله لقيت من يفهمني غير الكتاب فيه كل زين لحد الآن مالقيتش فيه مايعيب لين خشيت الجامعة لما كان القروب يتكلم ع النت و الكومبيوتر مكانوش يصدقو ان عندي كومبيوتر مش عارفة علاش فكان اقصى رد سمعته هو كان نسألك ع القمر تقولي مشيتله مش عارفة ليش ماكانوش يصدقو معليش عقولهم صغيره ومافيش مرونة و خيال هكي كنت نقول عليهم
مع افتتاح اول كفي نت في الجامعة فرحت هلبا لأن النت الي في الحوش كان تاعب و في الحوش مافيش حد يعلمك يعني يادوبك نفتح ع الاغاني وموقع عمرو خالد شويا ع المواقع الليبية القديمة رسوم الانمي و المانقا و غيرها بس بدون مايكون عندي ايميل وماكنتش نعرف كيف يديروه لكن لما كنت في الجامعة اكيد فيه من يساعد و فعلا لقيت من ساعدني كان فيه مهندس مصري اسمه اكرم نشكره الي عرفني ع النت و كان فيه صاحبه محمود علمني كيف نفتح ايميل الحمد لله لقيت من ساعدني و لأن محاضراتي كانت وحدة الصبح الثمانية و الي بعدها 2 و ماكانش عندي بطاقة مكتبة خليت من النت حوش بوي يعني ديما فيه صرت زبونة حتى لما كنت نكمل محاضرتي بكري و بابا يعطل عليا كان يعرفني في النت و كنت من الطالبات الي ماتحبش الزحمة فكنت الوحيدة الي مسموحلها تخش للصالة الداخلية صالة الدكاترة لاني كنت نعطل في النت صارلي ادمان نت نت نت نت نت نت نت نت لين جت الكارته وصلني ايميل شرير ف ماعرفتش نلغيه وديما يطلعلي ايميل مزعج ديما ديما يطلع بس كان بابا في سويسرا لازم نقعد ع النت و لازم نشوف كل الايميلات هومرات كان يبعث حتى من ايمي صاحبه او يقول لاي حد في الشركة يبعت دعيت ربي يساعدني لازم نفتح الايميل ماكنتش عارفة كيف يلغوه او كيف يعرفو من بعته كنت في موقف مش عارفة كيف نوصفه محتاجة نشوف بابا شن باعت و خايفة من ربي يحاسبني ع شوفت الصور يا حرام كنت بين نارين فدعيت يا رب نبي نعد لل10 لو بعتتلي حد نعرفة و خش للغرفة ح نطلب منه يساعدني و لو ماخش حد ح نفتح الايميلات و امري لله عديت 1 2 3 4 5 6 الباب انفتح كنت بروحي خفت ليكون دكتور لكن ماكانش ركتور كان ولد نعرفة ف وقف وقال انتي هنايا نحسابك برا فبان التوتر عليا نقوله، لا ،نقوله ،لا ،بعدين قلت هذا الي ربي بعتهولي توكلت على الله و قلتله ع المشكلة ف ساعدني و علمني كيف نلغي الايميلات المشكوك فيها و كيف ندير بلوك من غير مانفتحها، ومن هنايا عرفت ان في كل مكان فيه الزين و الشين حتى في النت لغيت كل ايميلاتي بعد ماروح بابا من السفر و فتحت ايميل في الياهو و سجلت في منتدى الهندسة نت بديت البكتابة في المندتى و كانت عاجبتني الفكرة بيت لكل المهندسين يعني انتماء للمكان زادت سعات الدخول للنت بسبب التقارير و الامثلة المعمارية و العمل و انزال البرامج و طبعا لايخلو الامر من انزال الألعاب فصار كل من يبحث عني اول مكان يدور فيه النت
تعلمت الكاد وفي فترة اعطيت دورة كاد بس كانت تقوية بس مش معتمدة و تعلمت مجموعة من برامج الرسم منها ماكان تعليم ذاتي اوعن تجربة او مساعدة من البرنامج نفسه مرات نطلب المساعدة من الخبراء او نتفرج علي غيري كيف يخدم و اخزن المعلومات صرت زي ماتقول نعرف شويا في كل شي بس نحتاج لدورات لاعتماد ماتعلمته ممكن ناخد دورة 4 شهور في الحاسوب و نحصل شهادة معهد متوسط الفكرة خاشة بالي لكن نستنى الوقت المناسب على فكرة لحد الآن صارلي مفسدة 4 اجهزة و الخامس بين ايديا و 3 مونتر وحدة انحرقت و وحدة صارت الوانها ع الازرق و الثانية ع الاخضر لكن الي عندي الوانها كويسة الحمد لله الكيبورد ممكن 8 او 9 الماوس حدث ولا حرج مش عارفة عددهم الطابعات الاولى ابيض و اسود استحملتني 4 سنين الحمد لله و الثانية ملونة فسدك في اقل من شهر و عندي الثالثة ربي يخليهالي اتش بي1513 ثلاثة في واحد و اخيرا و ليس آخرا مازال الطويل قدامي طويل مش نوصل للمكان الي نبيه في الكومبيوتر نبي شهادة و نبي كميرا ديجيتال تابث و متحرك و نبي نعرف كين انحول الأشرطة من كاميرة الفيديو للكومبيوتر و كيف تحول الشريط الكاسيت حتى هو للكومبيوتر و لحد توا هاذا مانبي .ممكن بعدين نحتاج كومبيوتر محمول .

كروت ليبيانا

من هواياتي الجديدة تجميع كروت الهواتف النقالة لأن منزلنا به العديد منها فأجد بعضها في مكتبة الصالون و اخرى بين الكثب و غيرها في درج الكومبيوتر و بين ادواتي و في جيوب الملابس و حتى في المطبخ و طبعا حتى في السيارة ، بعد انتهاء الدراسة و بداية مرحلة الملل و الكساد قمت بتجميع كل الكروت التي اصادفها في مكان واحد ومن الغريب وجود كروت المدار بينها لماذا لا أعلم فكل الهواتف النقالة في المنزل ذات شفرات ليبيانا ، المهم جمعتها و القيت نضرة فاحصة عليها و على ارقامها فوجدت ان بها رسومات و شعارات جميلة لكنها لا تخلو من الخطأ، الصور التالية للكروت و الاسماء التي اطلقتها عليها و بماذا ذكرتني .

هذا الكرت هو الكرت التقليدي الذي اصدرته الشركة فهو اول اصداراتها.

كرت عيد الفاتح الصراحة ماعجبنيش تصميمه ، ما اعطاش للمناسبة حقها .

كرت شهر رمضان و عيد الفطر كل حد بعد ما يعبيه يدسة لأن فيه الامساكية بحجم صغير .

كرت عيد الاضحى من الكروت الي عجبتني فيها فكرة في التصميم.

كرت البحر، ماعنديش مانقول فيه إلا انه فكرني بمدونة
Flying Birds

و آخر نموذج من الكروت هو النمودج السياحي و منها العديد من الأشكال

فسيفساء صبراته

غدامس

أكاكوس

هذا الكرت حبيت انحطه في الأخير لأن فيه خطأ فادح مكتوب ع الكرت شحات لكن الصورة صورة قوس في لبدة و نحب نقول للمسؤولين ان الليبيين و اكتر منهم السياح يعرفو الكثير عن هذه الآثار فعيب تغلطو هالغلطة و الله عيب .

كلمة أخيرة.
ديرو بالكم المرة الجاية لما تنشرو تصميم لكرت لأنك مش عارف في ايد منو يوصل هالتصميم.
الخلاصة الكروت حلوة و سعرها و تكمل بسرعة .

الغروب في جزيرة بسيس

صورة تبحث عن تعليق

سوء استخدام.

السلام عليكم
في هذه المرة، احب ان اعرف رأيكم في موضوع يمكن ان يكون قضية و ليس مجرد موضوع، لأن ثأثيراته على المجتمع لا يمكن تجاهلها.
موضوع سوء استخدام النقنية و خاصتا معدات التصوير الرقمية.
دعاني إلى توجيه النظر اليه هو زيادة اعداد المتضررات من هذا الفعل ، فكثير ما نسمع عن اخ قتل اخته لأنه و جد صورتها في نقال احدهم، او عن عروس دبحت لان صورها و جدت في الانترنت، او عن ام انكرها اولادها لانهم شاهدو مقطع فيديو مسجل لها و هي ترقص في احد الافراح ، كل هذا يحدث بسبب سوء استخدام التقنية من جهة و الجهل من جهةأخرى , هذا ما كنت اسمعه في عدة برامج في بلدان عربية و كنت اقول اين عقولهم ؟ ما ذنب المرأة اذا كان الذئب صورها و نشرصورتها ، لكن هذه الضاهرة وصلت الينا الي ليبيا .
الصور و المقاطع تختلف باختلاف المصور او الناشر ، و ردة الفعل تختلف باختلاف المستقبل لهذه الصور، يمكنني ان لقدم شرحا موجزا عن بعض هذه الصور.

فنجد الصورة مسموحة النشر كما اسميها و هي الصورة المأخودة للفتاة خارج منزلها مثال ذلك ما يحدث كثيرا في الجامعة من تصويرالثعالب الجالسة في الممرات للفتيات المارات دون علمهن ، هذه الصورة اقل تأثير من غيرها اذا نشرت كما هي ، أما إذا خضعت للتغيير فلا يمكن تصور تأثيرها.

النوع الآخر هو الصورة التي توخد بنقال شخص قريب يمكن ان يكون اخت أو أخ أو اب و تكون الصورة عائلية خاصة ليست للنشر، و تكون غالبا في المنزل ، قد تتسائلون و كيف تنتشر الصورة؟ اقول ببساطة عند ضياع او سرقة او بيع الجهاز يقوم بعض الثعالب بالعبث بمحتويات الجهاز و ارسالها .
و النوع الخطير هو ثلك الصور التي تؤخد للمرأة أو الفتاة في احد المناسبات أثناء رقصها و هي ترتدي ما يحلو لها من ثياب و هذه الاخيرة اخطر من قبلها في حالة نشرها .

و النوع القاتل هو ثلك التي يقوم الثعالب بادخال التعديلات و التغييرات عليها قبل نشرها بإلصاق صورة جسد تستحي العين من رؤيته و يكون تأثيرها قاتل لأن مستلمها قد يجن فيرتكب ما لا تحمد عقباه.

و هناك الكثير الكثير من الصور التي لا يسعني شرحها بل أكتفي بهذا القدر .

الآن أريدك أن تجيب ، أريدك أن تجيب يا أخي ماذا ستكون ردة فعلك عندما ترى صورة ابنتك ، أختك، امك، خطيبتك او حتى زوجتك ، في نقال غريب او في الانترنت، ماذا ستفعل؟
اريدك ان تجيب على سؤال آخر اذا كنت تهوى تصوير الاسرة هل ستعيد النظر في تصرفك ام تقول سأتخد الحدر و لن يضيع نقالي مني ، اقول لك هذا لا يكفي.
اريدك ايها الذئب الذي ينشر هذا النوع من الصور ماذا تعني من هذا النشر و ماذا ستجني غير الدعاء بالسخط و سوء المصير.

اخيرا اقول حمى الله المؤمنات من شر الذئاب.
و السلام عليكم و رحمة الله و بركاته.