في ليلة من الليالي فتحنا التلفزيون و سمعنا بوجود حراك شعبي في بنغازي . يا الله
و في ليلة سمعنا في الغرب صوت مظاهرة " يا قذافي موت موت الشعب الليبي كله خوت " . يا الله
و شفنا رتل ماشي للشرق " و بنغازي حبيبتي " .
و بدي الناتو يضرب .
و التوار يتقدمو و كر و فر في بن جواد .
مصراته و الزنتان و الزاوية .
شهداء .
شاكير و الدحية الخضرا و حمزة و هالة .
المكالمات المش مفهومة ، و الإعتقالات بالجملة ، و الخطف و القتل بلا سبب ، فقط كله خايف من كله .
.
وقت الثورة كنت ناخد في كتاب الأطلس و نتابع في النشرة و نشوف الثوار وين وصلوا و قداش مازال ، نفرح لما يقربوا و نزعل لما يوخروا ، هذا العلم في يوم 20 رمضان بنت الجيران كانت توزع فيهم ، بنوتة صغيرة خيطتهم مجموعة أعلام صغيرة بطريقتها و بغرزات عفوية ، و فرحانة بيهم و فرحانة بالتحرير ، حبيت نحتفظ بيه ذكرى .
تعرفوا أكثر شي أثر فيا في الثورة ؟؟؟
لما تحررت الزاوية أول مرة في رمضان ، كنت نتصل بإيمان كل يوم و نطمن عليها و نسأل فيها شن أخباركم ، أول يوم تحرروا فيه اتصلت بيا و تقول لي " تحررناااااااااااااا تحررنا يا وصال تحررنا الله أكبر و العقبة ليكم " كل ما نتفكر هذا الإحساس عيوني يدمعوا ، القلب قاعد بين الفرحة و بين القلق ، فرحانة إنهم تحرروا و نحن بعدهم بعون الله ، و خايفة عليها يرجع للزاوية و يدمرها ، الحمد لله قعدت الذكريات و إن شاء الله يسخر الخير للبلاد و العباد .
# فراشة #
