سيارتي إن شاء الله

الكل يحب السيارات، يحب قيادتها ومشاهدة عروضها و حتى المشاركة في العروض و القيام بما يعرف ‏بالتصطريب بالليبي و التفحيط بالخليجي المهم لو سألوك اي سيارة تحب اي موديل ممكن تقول بورش او ‏مرسيدس او حتى الصاروخ وهي السيارة الوحيدة الي بتصميم ليبي و الي سمعت عليها شوية في السنين الماضية ‏و بعدين معاش شفتها وعاش نعرف من يملكها ،لو سئلوك شن تحب في السيارة تقول السرعة العداد القوة او معدل الوصول من سرعة 0 الى 150 كيلو في ‏الساعة مرات تقول الصالون او المحرك و عدد السيلاندر و غيرها من امور القوة و الجمال.

لكن لو سئلونى عن سيارتي او السيارة الي نحب نشريها و تشكل احد احلامي المراد تحقيقها نقول الخنفساء ‏الجديدة ايه الخنفساء الجديدة و السبب ببساطة اني نحب السيارات الخنفساء بكل انواعها اول سيارة نسوقها كانت ‏خنفساء فكرونة بس مش عارفة شن موديلها كانت زرقاء اللون و حكايتي معاها لو معاكم و قت نحكيهالكم لأنها ‏طويلة شوية نحكيهالكم بالتفاصيل مرة تانية‏  إن شاء الله . المختصر المفيد انه كان عندي سواق خاص في السنة الاولى الابتدائي كان اسمه عم ابراهيم يسوق في فلكس ‏فكرونة يوصل فيا للمدرسة مرة جت في بالي فكرة السواقة ف قعمزت في كرسي السواق و سقت بالتعاون معاه مسافة صح قصيرة لكن عطتني احساس بالقيادة ‏و انتم تعرفو شعور القيادة لأول مرة .‏‏ ومنها و اني كل مانشوف خنفوساء تشد انتباهي سواء موديل جديد او قديم .

وكل حد من العيلة لما يشوفها يقولي شفت سيارتك صارت ماركتها سيارة فراشة .‏و نقول في الاخير الالمان عرفو يصنعو.‏